ຜູ້ໂດຍສານຊາວຍີ່ປຸ່ນ ເສຍຊີວິດຈາກອຸບັດຕິເຫດ 1 ຄົນທີ່ຫລວງນໍ້າທາ
ຜູ້ໂດຍສານຊາວຍີ່ປຸ່ນ ເສຍຊີວິດຄາທີ່ 1 ຄົນ ຈາກອຸບັດຕິເຫດລົດ 12 ລໍ້
ຕໍາກັບລົດໂດຍສານ ຫຼວງນໍ້າທາ, ທີ່ເກີດຂຶ້ນໃນຕົ້ນເດືອນກັນຍາ 2017 ທີ່ຜ່ານມາ, ທີ່ຖະໜົນ
R3 ຂອບເຂດບ້ານນໍ້າຈີຣ-ບ້ານພູລັນໃຕ້ ເມືອງວຽງພູຄາ ແຂວງຫຼວງນໍ້າທາ.
ເຈົ້າໜ້າທີ່ພະແນກຕຳຫຼວດຈາລະຈອນ ປກສ ແຂວງຫຼວງນໍ້າທາ ໃຫ້ຮູ້ວ່າ: ນາງຊີໂກະ ໂຊສຸກິ
ອາຍຸ 36 ປີ ສັນຊາດຍີ່ປຸ່ນ ເສຍຊີວິດຄາທີ່ ໃນອຸບັດຕິເຫດລົດ 12 ລໍ້ ຕໍາກັບລົດເມໂດຍສານ
ໃນຄັ້ງວັນທີ 5 ກັນຍາ 2017 ຜ່ານມາ, ເຊິ່ງທ້າວ ລີຫົງມີງ ອາຍຸ 45 ປີ
ຢູ່ບ້ານທົ່ງຫາຍ ເມືອງຢຸຍຊີ ແຂວງຢູນນານ ສປປ ຈີນ ຄູ່ລະນີໄດ້ໃຫ້ການຕໍ່ເຈົ້າໜ້າທີ່ວ່າ:
ກ່ອນເກີດເຫດໄດ້ຂັບຂີ່ລົດ 12 ລໍ້ ສີແດງ ຍີ່ຫໍ້ F53300 ອອກຈາກພູຄາ
ມຸ້ງໜ້າໄປສົ່ງສິນຄ້າຢູ່ບໍ່ແກ້ວ.
ພໍຮອດຈຸດເກີດເຫດຂອບເຂດທາງໂຄ້ງບ້ານນໍ້າຈີຣ-ບ້ານພູລັນໃຕ້ ເມືອງວຽງພູຄາ ແຂວງຫຼວງນໍ້າທາ
ໄດ້ຕຳໃສ່ລົດເມໂດຍສານສີຂາວ ຍີ່ຫໍ້ໂຕໂຍຕ້າ ທະບຽນ ບກ 0644 ຫຼວງນໍ້າທາ
ເຊິ່ງຂັບຂີ່ໂດຍທ້າວ ຈັນສີນວນ ອາຍຸ 40 ປີ ຂັບລົດຢູ່ບ້ານດອນໄຈ ເມືອງສິງ
ແຂວງຫຼວງນໍ້າທາ.
ອຸບັດຕິເຫດຄັ້ງນີ້,
ມີຜູ້ໂດຍສານທີ່ມາກັບລົດເມ ຈໍານວນ 15 ຄົນ; ໃນນີ້, ໄດ້ຮັບບາດເຈັບເລັກນ້ອຍ 4 ຄົນ ແລະ
ສົມຄວນ 3 ຄົນ.
ຂ່າວ:
ຫນັງສືພິມຄວາມສະຫງົບ