ຈີນ ສ້າງກອງທຶນການລົງທຶນ 15,3 ຕື້ໂດລາ ໃຫ້ແກ່ບັນດາໂຄງການຮ່ວມມືກັບຣັດເຊຍ
ທ່ານ ຫວາງຢາງ ຮອງນາຍົກລັດຖະມົນຕີຈີນ ແຈ້ງໃຫ້ຮູ້ເມື່ອບໍ່ດົນມານີ້ວ່າ ຈີນພວມດຳເນີນການສ້າງກອງທຶນການລົງທຶນມູນຄ່າ 100 ຕື້ຢວນ (ເທົ່າກັບ 15,3 ຕື້ໂດລາສະຫະລັດ) ເພື່ອໃຫ້ຄວາມຊ່ວຍເຫຼືອດ້ານການເງິນ ໃຫ້ແກ່ບັນດາໂຄງການຮ່ວມມືໃນພາກພື້ນ ລະຫວ່າງ ຈີນ ກັບ ຣັດເຊຍ.
ທ່ານ ຫວາງຢາງ ກ່າວຢູ່ນອກເວທີປາໄສເສດຖະກິດທິດຕາເວັນອອກ ຄັ້ງທີ 3 ທີ່ນະຄອນ ວາລາດີວົສຕົກ (ຣັດເຊຍ) ເມື່ອບໍ່ດົນມານີ້ວ່າ ຈີນມີຄວາມພ້ອມໃນການເພີ່ມຂອບຂະໜາດຂອງກອງທຶນການລົງທຶນດັ່ງກ່າວ ແລະ ສະເໜີໄປຍັງກອງທຶນເສັ້ນທາງສາຍໄໝ ໃຫ້ຄວາມຊ່ວຍເຫຼືອດ້ານການເງິນ ໃຫ້ແກ່ບັນດາໂຄງການຮ່ວມຂອງຈີນ ກັບ ຣັດເຊຍ.
ທ່ານ ຫວາງຢາງ ຍັງໃຫ້ຮູ້ຕື່ມວ່າ ລັດຖະບານຈີນ ສົ່ງເສີມບັນດາວິສາຫະກິດທີ່ລົງທຶນເຂົ້າໄປໃນເຂດຕາເວັນອອກໄກຂອງຣັດເຊຍ ແລະ ເປີດກວ້າງການຮ່ວມມືໃນຂົງເຂດການຜະລິດ ຂຸດຄົ້ນຊັບພະຍາກອນ ພື້ນຖານໂຄງລ່າງ ກະສິກຳ ແລະ ການທ່ອງທ່ຽວ.
ຂໍ້ມູນຈາກ: ວຽງຈັນໃຫມ່
