ທິບ ສະຫວັນ ເສຍ ປກສ 1-3, ນະຄອນຫຼວງ ເກັບໄຊນັດແຮກ ລາວ ພຣີເມຍລີກ 2017
ເມື່ອວັນທີ 14 ພຶດສະພາ ຜ່ານມາ ທີ່ສະໜາມກິລາສະຫວັນນະເຂດ ໄດ້ມີການແຂ່ງຂັນເຕະບານ ລາວ ພຣີເມຍລີກ 2017 ຮອບຂາໄປ ອາທິດທີ 6 ລະຫວ່າງ ສະໂມສອນ ທິບ ສະຫວັນ ເອັຟຊີ ທີມອັນດັບ 6 ຂອງຕາຕະລາງ ເປີດບ້ານຕ້ອນຮັບການມາຢາມຂອງ ສະໂມສອນ ປກສ ເອັຟຊີ ທີມອັນດັບ 2 ຂອງຕາຕະລາງ. ຜ່ານການແຂ່ງຂັນ ຜົນປາກົດວ່າ ທິບ ສະຫວັນ ເອັຟຊີ ເປີດບ້ານເສຍໃຫ້ກັບ ປກສ ເອັຟຊີ 1-3 ປະຕູ. ຈາກຜົນດັ່ງກ່າວ ເຮັດໃຫ້ ປກສ ເອັຟຊີ ຍັງຄົງຢູ່ອັນດັບທີ 2 ຂອງຕາຕະລາງຄືເກົ່າ ມີ 13 ຄະແນນ ໄລ່ຕາມຫຼັງ ທີມນຳຕາຕະລາງຢ່າງ ສະໂມສອນ ລາວ ໂຕໂຢຕ້າ ເອັຟຊີ ພຽງ 2 ຄະແນນເທົ່ານັ້ນ. ຂະນະທີ່ ທິບ ສະຫວັນ ເອັຟຊີ ກໍ່ຍັງຢູ່ອັນດັບ 6 ຄືເກົ່າ.
ສ່ວນຜົນອີກ 3 ຄູ່ ປະກອບມີ ໃນວັນທີ 13 ພຶດສະພາ ຜ່ານມາ ທີ່ສະໜາມເຈົ້າອານຸວົງ ສະໂມສອນ ນະຄອນຫຼວງ ຢູໄນເຕັດ ທີມອັນດັບ 7 ຂອງຕາຕະລາງ ເກັບໄຊຊະນະນັດແຮກໄດ້ສຳເລັດ ຫຼັງເປີດບ້ານບຽດເອົາຊະນະ ສະໂມສອນ ສະຫວັນ ຢູໄນເຕັດ ທີມອັນດັບ 3 ຂອງຕາຕະລາງ ໄປແບບຫວຸດຫວິດ 2-1 ປະຕູ ຜົນສົ່ງໃຫ້ ນະຄອນຫຼວງ ຢູໄນເຕັດ ເກັບເພີ່ມເປັນ 4 ຄະແນນ ຢູ່ອັນດັບເກົ່າ ແລະ ສົ່ງຜົນໃຫ້ ສະຫວັນ ຢູໄນເຕັດ ຕົກລົງມາຢູ່ອັນດັບ 4 ຂອງຕາຕະລາງ ດ້ວຍ 10 ຄະແນນ. ຂະນະທີ່ໃນວັນທີ 14 ພຶດສະພາ 2017 ທີ່ສະໜາມແຂວງຈຳປາສັກ ສະໂມສອນ ໄອດີຊີ ຈຳປາສັກ ຢູໄນເຕັດ ທີມອັນດັບ 8 ຂອງຕາຕະລາງ ເປີດບ້ານຖືກ ສະໂມສອນ ລາວ ໂຕໂຢຕ້າ ເອັຟຊີ ທີມອັນດັບ 1 ຂອງຕາຕະລາງ ຖະຫຼົ່ມໄປແບບໝົດສະພາບ 6-1 ປະຕູ ແລະ ທີ່ສະໜາມເຈົ້າອານຸວົງ ສະໂມສອນ ດີເຄ ເອັຟຊີ ທີມອັນດັບ 5 ຂອງຕາຕະລາງ ເປີດບ້ານຖືກ ສະໂມສອນ ມຊ ເອັຟຊີ ທີມອັນດັບ 4 ຂອງຕາຕະລາງ ເອົາຊະນະໄປແບບຫວຸດຫວິດ 2-1 ປະຕູ ແລະ ສົ່ງຜົນໃຫ້ ມຊ ເອັຟຊີ ເກັບເພີ່ມເປັນ 12 ຄະແນນ ຫຍັບຂຶ້ນໄປຢູ່ອັນດັບ 3 ມີ 12 ຄະແນນ ໃນອາທິດນີ້.
ພາຍຫຼັງສຳເລັດການແຂ່ງຂັນໃນອາທິດທີ 6 ອັນດັບ 1 ຍັງເປັນຂອງ ສະໂມສອນ ລາວ ໂຕໂຢຕ້າ ເອັຟຊີ ມີ 15 ຄະແນນ, ອັນດັບ 2 ສະໂມສອນ ປກສ ເອັຟຊີ ມີ 13 ຄະແນນ, ອັນດັບ 3 ສະໂມສອນ ມຊ ເອັຟຊີ ມີ 12 ຄະແນນ, ອັນດັບ 4 ສະໂມສອນ ສະຫວັນ ຢູໄນເຕັດ ມີ 10 ຄະແນນ, ອັນດັບ 5 ສະໂມສອນ ດີເຄ ເອັຟຊີ ມີ 9 ຄະແນນ, ອັນດັບ 6 ສະໂມສອນ ທິບ ສະຫວັນ ເອັຟຊີ ມີ 6 ຄະແນນ, ອັນດັບ 7 ສະໂມສອນ ນະຄອນຫຼວງ ຢູໄນເຕັດ ມີ 4 ຄະແນນ ແລະ ອັນດັບ 8 ສະໂມສອນ ໄອດີຊີ ຈຳປາສັກ ຢູໄນເຕັດ ມີ 1 ຄະແນນ.