ລາວ ພົບ ຫວຽດນາມ ຕັດສິນເຂົ້າຮອບ 4 ທີມ ເຕະບານຍິງ ຢູ-15 ຊີງແຊມອາຊຽນ 2017
ທັບສາວນ້ອຍທີມຊາດລາວ ຮຸ່ນອາຍຸບໍ່ເກີນ 15 ປີ ກຽມລົງສະໜາມນັດສຸດທ້າຍ ພົບກັບ ທີມຊາດຫວຽດນາມ ເພື່ອຕັດສິນລຸ້ນເຂົ້າສູ່ຮອບຮອງຊະນະເລີດ ຫຼື 4 ທີມສຸດທ້າຍ ໃນຕອນແລງມື້ນີ້ ຫຼັງນັດທີ 3 ຖືກ ທີມຊາດໄທ ໄລ່ຖະຫຼົ່ມໄປແບບໝົດສະພາບ 3-0 ພ້ອມກັບລຸ້ນໃຫ້ທີມຊາດມາເລເຊຍ ເອົາຊະນະ ທີມຊາດມຽນມາ ໃນການແຂ່ງຂັນເຕະບານຍິງ ຮຸ່ນອາຍຸບໍ່ເກີນ 15 ປີ ຊີງແຊ໋ມອາຊຽນ 2017 ທີ່ ສປປ ລາວ ເປັນເຈົ້າພາບ.
ເມື່ອວັນທີ 14 ພຶດສະພາ ຜ່ານມາ ທີ່ສະໜາມກິລາແຫ່ງຊາດ (ຫຼັກ 16) ນະຄອນຫຼວງວຽງຈັນ, ໄດ້ມີການແຂ່ງຂັນເຕະບານຍິງ ຮຸ່ນອາຍຸບໍ່ເກີນ 15 ປີ ຊີງແຊ໋ມອາຊຽນ 2017 ທີ່ ສປປ ລາວ ເປັນເຈົ້າພາບ ລະຫວ່າງວັນທີ 8-20 ພຶດສະພາ 2017, ເຊິ່ງເປັນການລົງແຂ່ງຂັນຂອງກຸ່ມ ເອ ລະຫວ່າງ ທີມຊາດລາວ ທີມອັນດັບ 2 ຂອງຕາຕະລາງ ພົບກັບ ທີມຊາດໄທ ທີມນຳຕາຕະລາງ. ຜ່ານການແຂ່ງຂັນ ຜົນປາກົດວ່າ ສາວນ້ອຍລາວເຮົາ ຖືກ ໄທ ໄລ່ຖະລົ່ມໄປແບບໝົດສະພາບ 3-0 ປະຕູ. ໂດຍປະຕູຂອງທີມຊາດໄທ ໄດ້ມາຈາກ ສຸຊະດາ ຄຳຈະເລີນ ໃນນາທີ 16, 19 ແລະ ການຍິງເຂົ້າປະຕູຕົວເອງຂອງ ເປເປ້ ກອງກາງທີມຊາດລາວ ໃນນາທີ 72. ຈາກຜົນການແຂ່ງຂັນດັ່ງກ່າວ, ສົ່ງຜົນໃຫ້ທີມຊາດໄທ ຜ່ານເຂົ້າສູ່ຮອບຮອງຊະນະເລີດ ເປັນທີມທຳອິດຂອງກຸ່ມ ດ້ວຍການລົງສະ ໜາມ 4 ນັດ ຊະນະລວດ ມີ 12 ຄະແນນ ໄປພົບກັບ ທີມຊາດກຳປູເຈຍ ທີມອັນດັບ 2 ຂອງກຸ່ມ ບີ ໃນວັນທີ 18 ພຶດສະພາ 2017.
ຂະນະທີ່ ທີມຊາດລາວ ຕົກມາຢູ່ອັນດັບ 3 ຂອງຕາຕະລາງ ມີ 3 ຄະແນນ ຈາກການລົງສະໜາມ 3 ນັດ ແຕ່ຍັງມີໂອກາດຜ່ານເຂົ້າສູ່ຮອບຮອງຊະນະເລີດ ຖ້ານັດສຸດທ້າຍສາມາດເອົາຊະນະ ທີມຊາດຫວຽດນາມ ໃນວັນທີ 16 ພຶດສະພາ 2017 ເວລາ 18:30 ໂມງ ແລະ ຕ້ອງລຸ້ນໃຫ້ ທີມຊາດມາເລເຊຍ ທີມອັນດັບທ້າຍຂອງຕາຕະລາງ ເອົາຊະນະ ທີມຊາດມຽນມາ ທີມອັນດັບ 2 ຂອງຕາຕະລາງ ທີ່ມີ 6 ຄະແນນ ຈາກການລົງສະໜາມ 3 ນັດ ໃນວັນດຽວກັນ ເວລາ 16:00 ໂມງ ແລ້ວຈຶ່ງມານັບລູກໄດ້ລູກເສຍ ເພື່ອຕັດສິນລຸ້ນເຂົ້າຮອບຮອງຊະນະເລີດ ຫຼື 4 ທີມສຸດທ້າຍ. ສ່ວນ ທີມ ອັນດັບ 2 ຂອງກຸ່ມ ເອ ແມ່ນຈະພົບກັບ ທີມຊາດຟີລິບປິນ ທີມອັນດັບ 1 ຂອງກຸ່ມ ບີ ທີ່ລົງສະໜາມ 3 ນັດ ຊະນະລວດ ມີ 9 ຄະແນນ ໃນວັນທີ 18 ພຶດສະພາ 2017.