ເຂື່ອນໄຟຟ້ານ້ຳງື່ມ I ເລັ່ງພັດທະນາເຄື່ອງຈັກ ເພີ່ມກຳລັງການຜະລິດ
ລັດຖະບານລາວ ໄດ້ສົມທົບທຶນກູ້ຢືມຈາກ ສປ ຈີນ ເພື່ອດຳເນີນການພັດທະນາ ແລະ ຂະຫຍາຍເຂື່ອນໄຟຟ້ານ້ຳງື່ມ 1 ໂດຍມີການຕິດຕັ້ງເຄື່ອງຈັກເພີ່ມອີກ 2 ໜ່ວຍ (ເບີ 7 ແລະ ເບີ 8) ມີກຳລັງຕິດຕັ້ງ 80 ເມກາວັດ ເຊິ່ງຈະເພີ່ມກຳລັງຜະລິດພະລັງໄຟຟ້າຈາກເດີມ 155 ມາເປັນ 235 ເມກາວັດ ເພື່ອຕອບສະໜອງ ແລະ ຮອງຮັບການຊົມໃຊ້ໄຟຟ້າພາຍໃນປະເທດທີ່ນັບມື້ເພີ່ມສູງຂຶ້ນ ໂດຍສະເພາະ ຢູ່ນະຄອນຫຼວງວຽງຈັນ ໃນໄລຍະທີ່ນຳໃຊ້ໄຟຟ້າສູງສຸດຂອງລະດູແລ້ງ.
ທ່ານ ດາວວຽງ ສຸນັນທະລາດ ຮອງຫົວໜ້າໂຄງການເຂື່ອນໄຟຟ້ານ້ຳງື່ມ 1 ພາກຂະຫຍາຍຝ່າຍ ກໍ່ສ້າງເຂື່ອນລັດວິສາຫະກິດໄຟຟ້າລາວ ເປີດເຜີຍໃຫ້ຮູ້ວ່າ: ການກໍ່ສ້າງໂຄງການດັ່ງກ່າວ ໄດ້ເລີ່ມຈັດຕັ້ງປະຕິບັດເມື່ອກາງປີ 2015 ມາຮອດປັດຈຸບັນສຳເລັດແລ້ວ 88% ສຳລັບໜ້າວຽກສຳຄັນປະກອບມີການກໍ່ສ້າງຂົວຂ້າມນ້ຳງື່ມ ມີຄວາມຍາວເກືອບ 200 ແມັດ ກວ້າງ 10 ແມັດ ສ້າງເສັ້ນທາງຍາວ 2.600 ແມັດ ເຮືອນຈັກ ແລະ ຄອງນ້ຳທ້າຍເຂື່ອນ ອຸບມົງສົ່ງນ້ຳ 2 ທໍ່ ຂະໜາດ 6,6 ແມັດ ຍາວ 313 ແມັດ ປະຕູນ້ຳ ລວມທັງການຕິດຕັ້ງອຸປະກອນຢູ່ເຮືອນຈັກ ແລະ ອື່ນໆ ພ້ອມນີ້ ຍັງມີການກໍ່ສ້າງລະບົບສາຍສົ່ງ 115 ກິໂລໂວນ ສອງວົງຈອນມີຄວາມຍາວ 4 ກິໂລແມັດ ສຳລັດ 43% ມູນຄ່າການກໍ່ສ້າງທັງໝົດ 122 ລ້ານໂດລາສະຫະລັດ ແລະ ຄາດວ່າຈະສຳເລັດສົມບູນໃນກາງປີ 2018 ໜ້ານີ້.
ທ່ານ ດາວວຽງ ສຸນັນທະລາດ ໃຫ້ຮູ້ຕື່ມວ່າ: ພາຍຫຼັງສຳເລັດການພັດທະນາເຂື່ອນໄຟຟ້ານ້ຳງື່ມ 1 ໂຄງການພາກຂະຫຍາຍ ເຊິ່ງມີເຄື່ອງຈັກໜ່ວຍທີ 7 ແລະ 8 ກໍ່ຈະສືບຕໍ່ພັດທະນາກໍ່ສ້າງເຄື່ອງຈັກໜ່ວຍທີ 6 ຢູ່ໃນຕົວເຂື່ອນ ຕິດກັບປະຕູນ້ຳອີກໜຶ່ງເຄື່ອງ ມີກຳລັງຕິດຕັ້ງ 40 ເມກາວັດ ຄາດວ່າຈະສຳເລັດການກໍ່ສ້າງໃນທ້າຍປີ 2019 ເຊິ່ງຈະເປັນການເພີ່ມກຳລັງການຜະລິດໄຟຟ້າໃນເຂື່ອນແຫ່ງນີ້ຫຼາຍຂຶ້ນຕື່ມອີກ.
ນອກຈາກເປັນການສະໜອງຕໍ່ພາຍໃນ ແລະ ສົ່ງອອກຕ່າງປະເທດ ເພື່ອນຳລາຍຮັບເງິນຕາປະກອບສ່ວນພັດທະນາປະເທດຊາດແລ້ວ ຍັງເປັນການສົ່ງເສີມການທ່ອງທ່ຽວຢູ່ເຂດອ່າງໂຕ່ງ ແລະ ເຂດແມ່ນ້ຳງື່ມຕອນທ້າຍຂອງເຂື່ອນອີກດ້ວຍ.
ສິ່ງສຳຄັນແມ່ນໄດ້ເພີ່ມປະສິດທິພາບ ແລະ ປະສິດທິຜົນໃນການນຳໃຊ້ຊັບພະຍາກອນນ້ຳທຳມະຊາດ ໃຫ້ເກີດປະໂຫຍດສູງສຸດ ເພື່ອຜະລິດເປັນພະລັງງານໄຟຟ້າໃຫ້ກາຍເປັນແຫຼ່ງທຶນ ຢ່າງໃດກໍ່ຕາມ ການນຳໃຊ້ນ້ຳໃນເຂດອ່າງໂຕ່ງຂອງເຂື່ອນໄຟຟ້ານ້ຳງື່ມ 1 ໃນໄລຍະຜ່ານມາເຫັນວ່າບໍ່ທັນຄຸ້ມຄ່າ ເພາະອ່າງໂຕ່ງຂອງເຂື່ອນແຫ່ງນີ້ ມີແມ່ນ້ຳຫຼາຍສາຂາລວມທັງຫ້ວຍຮ່ອງຄອງບຶງໄຫຼເຂົ້າສູ່ອ່າງ ເຊິ່ງໃນລະດູຝົນກໍ່ຈະມີການປ່ອຍນ້ຳລົງສູ່ທ້າຍເຂື່ອນ ນອກຈາກຈະເປັນການປ່ອຍນ້ຳທີ່ລ້ວນແຕ່ເປັນເມັດເງິນ-ເມັດຄຳຖີ້ມແລ້ວ ຍັງສົ່ງຜົນກະທົບຕໍ່ປະຊາຊົນທີ່ດຳລົງຊີວິດລຽບແມ່ນ້ຳງື່ມຢ່າງຫຼວງຫຼາຍ ສະນັ້ນ ພາຍຫຼັງສຳເລັດໂຄງການພາກຂະຫຍາຍ ອາດຈະບໍ່ມີການປ່ອຍນ້ຳລົງຜ່ານປະຕູນ້ຳທີ່ເຄີຍປະຕິບັດກັນໃນທຸກປີຂອງລະດູຝົນຕື່ມອີກ. (ຂ່າວໜັງສືພິມວຽງຈັນໃຫ່ມ)