ປກສ ນະຄອນຫຼວງ ມ້າງເຄືອຂ່າຍຢາບ້າ ພ້ອມຂອງກາງຢາບ້າ 1 ແສນກວ່າເມັດ
ໃນທ້າຍເດືອນກໍລະກົດ 2017 ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ນະຄອນຫຼວງວຽຈັນ ໄດ້ມ້າງເຄື່ອຂາຍກຸ່ມແກ້ງຄ້າຂາຍຢາເສບຕິດ ຢູ່ນະຄອນຫຼວງວຽງຈັນ ພ້ອມຂອງກາງ 85 ກວ່າມັດ ເທົ່າກັບ 1,7 ແສນກວ່າເມັດ ໄປສອບສວນດໍາ ເນີນຄະດີຕາມກົດໝາຍ.
ຫົວໜ້າພະແນກ ຕໍາຫຼວດສະກັດກັ້ນ ແລະ ຕ້ານຢາເສບຕິດ ນະຄອນຫຼວງວຽງຈັນ ໄດ້ຖະແຫຼ່ງຂ່າວຕໍ່ສືມ່ວນຊົນ ປກສ ໃນວັນທີ 8 ສິງຫາ 2017 ວ່າ: ກຸ່ມແກ້ງດັ່ງກ່າວແມ່ນໄດ້ລັກລອບເຄື່ອນໄຫວ ເປັນທີມ, ເຊິ່ງເປັນເປົ້າໝາຍຕິດຕາມຕົວມາໄດ້ຫຼາຍເດືອນ. ກ່ອນຈັບຕົວໄດ້ ເຈົ້າໜ້າທີ່ຕໍາຫຼວດໄດ້ເຂົ້າກັກຕົວນາງ ຂວັນໃຈ ຫຼື ຂວັນ ອາຍຸ 47 ປີ ແລະ ນາງ ວຽງສະໄໝ ຫຼື ແດງ ອາຍຸ 41 ປີ ທັງສອງຢູ່ ບ້ານນາໄຫ ເມືອງຫາດຊາຍຟອງ ນະຄອນຫຼວງວຽງຈັນ. ໃນວັນທີ 31 ກໍລະກົດ 2017, ມາສອບສວນຂະຫຍາຍຜົນ.
ຜ່ານການສອບສ່ວນພວກກ່ຽວໄດ້ຊັດທອດຫາຜູ້ຮ່ວມຂະບວນການນໍາກັນອີກ 4 ຄົນ ຊື່ ທ້າວ ອາຍີ້ ອາຍຸ 20 ປີ ແລະ ນາງ ກອງ ອາຍຸ 20 ປີ, ທ້າວ ອ້າຍ ອາຍຸ 19 ປີ ແລະ ທ້າວ ອາຊ່າງ ອາຍຸ 18 ປີ ທັງ 4 ຢູ່ ບ້ານໃໝ່ ເມືອງ ແລະ ແຂວງ ທ່າຂີ້ເຫຼັກ ປະເທດມຽນມາ ພັກເຊົາ ຢູ່ບ້ານໂຊກນ້ອຍ ເມືອງໄຊເສດຖາ ນະຄອນຫຼວງວຽງຈັນ ມາສອບສວນ ຂະຫຍາຍຜົນ. ຈາກການສອບສວນພວກກ່ຽວຮັບສາລະພາບວ່າ: ຢາບ້າ ທີ່ນໍາໄປຂາຍແມ່ນຮັບມາຈາກທ້າວ ໜູກອນ ອາຍຸ 31 ປີ ແລະ ນາງ ສ້ອຍສຸດາ ອາຍຸ 28 ປີ ( ເປັນຜົວເມຍກັນ ) ຢູ່ບ້ານ ໂພນສະອາດ ເມືອງ ແລະ ແຂວງຫຼວງພະບາງ ພັກເຊົາຢູ່ບ້ານໂນນສະຫວ່າງ ເມືອງໄຊເສດຖາ. ຈາກນັ້ນ, ເຈົ້າໜ້າທີ່ຕໍາຫຼວດຈຶ່ງໄດ້ເຂົ້າກວດຄົ້ນເຮືອນຜົວເມຍດັ່ງກ່າວ ພົບເຫັນຂອງກາງຢາບ້າ 85 ມັດ ກັບ 24 ເມັດ ເທົ່າກັບ 170.024 ເມັດ ແລະ ເວລາຕໍ່ມາເຂົ້າກັກຕົວໄດ້ອີກ 2 ຄົນ ເຊິ່ງເປັນເຄື່ອຂາຍດຽວກັນ ຊື່ ທ້າວ ຕາ ອາຍຸ 36 ປີ ແລະ ນາງ ປານີ ອາຍຸ 24 ປີ ( ເປັນຜົວເມຍກັນ) ຢູ່ບ້ານ ຈໍາປາ ເມືອງສີໂຄດຕະບອງ ນະຄອນຫຼວງວຽງຈັນ.
ປັດຈຸບັນຄະດີດັ່ງກ່າວ, ເຈົ້າໜ້າທີ່ກໍາລັງເລັ່ງສອບສວນຂະຫຍາຍຜົນ ເພື່ອຊອກຫາຜູ້ຮ່ວມຂະບວນການອີກ ເພື່ອຕິດຕາມກັກຕົວມາດໍາເນີນຄະດີຕາມກົດໝາຍ ແລະ ສະຫຼຸບສໍານວນຄະດີສົ່ງໃຫ້ອົງການໄອຍະການ ດໍາເນີນຄະດີຕາມຂັ້ນຕອນຂອງກົດໝາຍຕໍ່ໄປ.
+ຂ່າວຈາກ: ປກສ.