ນະຄອນຫຼວງ ເດີນໜ້າສືບຕໍ່ສ້າງກອງທຶນທາງປະຊາຊົນ
ອົງການປົກຄອງນະຄອນຫຼວງວຽງຈັນ (ນວ) ໄດ້ນຳເອົາຮ່າງການສ້າງຕັ້ງກອງທຶນທາງປະຊາຊົນ ສະເໜີຕໍ່ສະພາປະຊາຊົນ ນວ ມາສອງຄັ້ງ ແລະ ຄັ້ງຫຼ້າສຸດເຫັນດີຮັບຮອງເອົາດ້ວຍຄະແນນສຽງ 81% ກວມເອົາຄະແນນສຽງສ່ວນຫຼາຍ ແຕ່ກອງທຶນທາງຈະສາມາດສ້າງຕັ້ງຂຶ້ນໄດ້ຫຼືບໍ່ນັ້ນ ແມ່ນຕ້ອງຂຶ້ນກັບການພິຈາລະນາຮັບຮອງຂອງລັດຖະບານ ແລະ ສະພາແຫ່ງຊາດ.
ທ່ານ ສິນລະວົງ ຄຸດໄພທູນ ເຈົ້າຄອງ ນວ ໄດ້ສຳພາດວັນທີ 18 ສິງຫານີ້ວ່າ: ຄະນະພັກ-ອົງການປົກຄອງ ແລະ ສະພາປະຊາຊົນ ນວ ໄດ້ສ້າງກອງທຶນທາງຂຶ້ນມີຈຸດປະສົງ ເພື່ອລະດົມຂົນຂວາຍບຸກຄົນ ນິຕິບຸກຄົນປະກອບສ່ວນເຂົ້າໃນການກໍ່ສ້າງສ້ອມແປງບູລະນະ ແລະ ກໍ່ສ້າງເສັ້ນທາງຮ່ອມທາງຊອຍໃນເທສະບານ ແລະ ຊານເມືອງ ເຮັດໃຫ້ການສັນຈອນບົນຖະໜົນມີຄວາມປອດໄພຮັບປະກັນ ນວ ຫຼຸດພົ້ນອອກຈາກສະຖານະພາບຄວາມດ້ອຍພັດທະນາດ້ານພື້ນຖານໂຄງລ່າງ ແລະ ມີສ່ວນບັນເທົາໜີ້ສິນສາທາລະນະຈາກການກໍ່ສ້າງເສັ້ນທາງ.
ປັດຈຸບັນ ພື້ນຖານໂຄງລ່າງຖະໜົນຫົນທາງໃນ ນວ ໄດ້ຮັບການພັດທະນາພຽງ 30% ສ່ວນທີ່ເຫຼືອແມ່ນຍັງບໍ່ໄດ້ຮັບການກໍ່ສ້າງ ແລະ ສ້ອມແປງໄລຍະຜ່ານມາ ນວ ໄດ້ມີນະໂຍບາຍກໍ່ສ້າງເສັ້ນທາງໂດຍປະຊາຊົນມີສ່ວນຮ່ວມກັບ ນວ ໃນນັ້ນເປັນທຶນປະຊາຊົນ 30% ແລະ ລັດ 70% ໄດ້ມອບໝາຍໃຫ້ບໍລິສັດເອກະຊົນລົງທຶນກ່ອນ ຜ່ານການກໍ່ສ້າງທາງໄດ້ສຳເລັດປະມານ 18 ເສັ້ນ ແຕ່ພາຍຫຼັງກໍ່ສ້າງສຳເລັດ ບາງເສັ້ນທາງຍັງບໍ່ທັນໄດ້ສຳລະຄ່າກໍ່ສ້າງໃຫ້ບໍລິສັດ ເຊັ່ນ: ເສັ້ນທາງໜອງແຕ່ງ ແລະ ເສັ້ນທາງດອນໜູນ-ທ່າງອນ ໃນປີໜຶ່ງ ນວ ໄດ້ຮັບທຶນຈາກລັດຖະບານພຽງ ປີລະ 500 ລ້ານກີບ ເພື່ອນຳໃຊ້ເຂົ້າໃນການສ້ອມແປງເສັ້ນທາງ ເຊິ່ງທຶນດັ່ງກ່າວ ເຫັນວ່າບໍ່ພຽງພໍສຳລັບປີ 2017 ໄດ້ຮັບຕົວເລກເພີ່ມຂຶ້ນເປັນ 6,6 ຕື້ກີບ ມາຮອດປັດຈຸບັນ ບໍ່ໄດ້ຮັບເງິນເທື່ອເຖິງຈະໄດ້ຮັບງົບປະມານເພີ່ມ ແຕ່ກໍ່ຍັງບໍ່ພຽງພໍກັບຄວາມຕ້ອງການທີ່ທາງພະແນກໂຍທາທິການ ແລະ ຂົນສົ່ງ ນວ ຕ້ອງການປີລະ 20 ຕື້ກີບ ເພື່ອແກ້ໄຂສ້ອມແປງເສັ້ນທາງໃນ ນວ.
ປັດຈຸບັນ ພາຫະນະໃນ ນວ ມີປະມານ 8 ແສນກວ່າຄັນສະນັ້ນ ຖ້າບັນດາເຈົ້າຂອງລົດເຫັນຄວາມສຳຄັນໃນການແກ້ໄຂບັນຫາດັ່ງກ່າວ ພ້ອມກັນປະຕິບັດຕາມກົດລະບຽບກອງທຶນທາງປະຊາຊົນ ຈະຊ່ວຍໃຫ້ພື້ນຖານໂຄງລ່າງຖະໜົນທາງໃນ ນວ ໄດ້ຮັບການພັດທະນາຍົກລະດັບດີຂຶ້ນ ໃຫ້ສົມກັບວ່າ ນວ ເປັນນະຄອນຫຼວງຂອງປະເທດ ແລະ ສາມາດນຳເງິນຫ່ວງດັ່ງກ່າວມາແກ້ໄຂບັນຫາໜີ້ສິ້ນ ທີ່ຍັງຄ້າງຊຳລະໃຫ້ກັບບໍລິສັດທີ່ກໍ່ສ້າງທາງໃຫ້ປະຊາຊົນ ໄດ້ໄປມາຢ່າງສະດວກສະບາຍນຳອີກດ້ວຍ ສຳລັບການຄຸ້ມຄອງກອງທຶນທາງ ແມ່ນມອບໃຫ້ບັນດາເມືອງເປັນຜູ້ຄຸ້ມຄອງຂຶ້ນທະບຽນພາຫະນະ.
ຖ້າກອງທຶນທາງສາມາດສ້າງຕັ້ງຂຶ້ນ ຈະສາມາດນຳລາຍຮັບຈາກກອງທຶນນີ້ມາກໍ່ສ້າງ ແລະ ສ້ອມແປງເສັ້ນທາງໃນ ນວ ໃຫ້ມີຄວາມຈະເລີນສີວິໄລຂຶ້ນໄດ້ຢ່າງແນ່ນອນ ແຕ່ກອງທຶນທາງຈະເກີດຂຶ້ນໄດ້ນັ້ນ ຕ້ອງໄດ້ຮັບການພິຈາລະນະເຫັນດີຈາກຫຼາຍພາກສ່ວນ ໂດຍສະເພາະລັດຖະບານ ແລະ ສະພາແຫ່ງຊາດ ປັດຈຸບັນ ກອງທຶນທາງປະຊາຊົນເປັນພຽງບາດກ້າວທຳອິດທີ່ອົງການປົກຄອງ ນວ ຮ່າງຂຶ້ນມາ ຜ່ານພຽງແຕ່ຂັ້ນທ້ອງຖິ່ນເທົ່ານັ້ນ ແລະ ໃນຕໍ່ໜ້າ ແມ່ນໄດ້ມີແຜນເຜີຍແຜ່ການສ້າງຕັ້ງກອງທຶນທາງປະຊາຊົນ ໃຫ້ກັບພາກສ່ວນທີ່ກ່ຽວຂ້ອງ ແລະ ປະຊາຊົນ ໃຫ້ຮັບຮູ້ທັງເປັນການຢັ່ງຫາງສຽງຄວາມເຫັນດີຈາກປະຊາຊົນ ສຳລັບກອງທຶນທາງປະຊາຊົນ ນວ ແມ່ນບໍ່ໄດ້ຊ້ຳຊ້ອນກັບກອງທຶນທາງຫຼວງຂອງລັດຖະບານ.
ແຫຼ່ງຂ່າວ:ວຽງຈັນໃໝ່
