ສະພາຄວາມໝັ້ນຄົງ ສປຊ ຮັບຮອງມະຕິປິດລ້ອມເທື່ອໃໝ່ ຕໍ່ ສປປ ເກົາຫຼີ
15 ປະເທດທີ່ເປັນສະມາຊິກສະພາຄວາມໝັ້ນຄົງຂອງອົງການສະຫະປະຊາຊາດ ໄດ້ເຫັນດີເປັນເອກະສັນກັນ ໃນຕອນເຊົ້າວັນທີ 12 ກັນຍານີ້ ກ່ຽວກັບການຮັບຮອງມະຕິສະບັບໃໝ່ ໃນການເພີ່ມທະວີຄຳສັ່ງປິດລ້ອມ ສປປ ເກົາຫຼີ ເພື່ອຕອບໂຕ້ຕໍ່ການທົດລອງນີວເຄລຍຄັ້ງທີ 6 ຂອງ ສປປ ເກົາຫຼີ ທີ່ມີຂຶ້ນເມື່ອວັນທີ 3 ກັນຍາທີ່ຜ່ານມາ.
ມະຕິໃໝ່ທີ່ໄດ້ຮັບການຮັບຮອງດັ່ງກ່າວ ເປັນການຮັດເຄັ່ງມາດຕະການປິດລ້ອມຂອງມະຕິຫຼ້າສຸດກ່ອນໜ້ານີ້ ທີ່ໄດ້ຮັບຮອງໄປເມື່ອວັນທີ 5 ກັນຍາ ແຕ່ວ່າ “ເບົາ” ກວ່າຫຼາຍ ເມື່ອທຽບໃສ່ຮ່າງມະຕິຊຶ່ງເອກອັກຄະລັດຖະທູດ ສ ອາເມຣິກາ ປະຈຳອົງການສະຫະປະຊາຊາດ ນຳອອກມາເມື່ອວັນທີ 6 ກັນຍາ.
ມາດຕະການປິດລ້ອມທີ່ແຂງແກ່ນທີ່ສຸດຢູ່ໃນມະຕິໃໝ່ຫຼ້າສຸດນີ້ ກໍແມ່ນຫ້າມສົ່ງອອກສິນຄ້າຕັດຫຍິບທັງໝົດຂອງ ສປປ ເກົາຫຼີ ຊຶ່ງເມື່ອປີທີ່ຜ່ານມາ ຂະແໜງການອຸດສາຫະກຳຕັດຫຍິບໄດ້ນຳມາຊຶ່ງລາຍຮັບເກືອບ 1 ຕື້ໂດລາສະຫະລັດ ໃຫ້ແກ່ ສປປ ເກົາຫຼີ.
ຄຽງຄູ່ກັນນັ້ນ ມະຕິໃໝ່ດັ່ງກ່າວກໍຮັກສາຄຳສັ່ງປິດລ້ອມແກັສທຳມະຊາດໄວ້ຄືເກົ່າ ແຕ່ວ່າປະຕິບັດພຽງທີ່ລະດັບເພດານສຳລັບການສົ່ງອອກນ້ຳມັນທີ່ໄດ້ປຸງແຕ່ງຢ່າງລະອຽດ ເຂົ້າໄປຍັງ ສປປ ເກົາຫຼີ ໄວ້ທີ່ລະດັບ 500.000 ບາເຣນ ພາຍໃນຮອບເວລາ 3 ເດືອນ ໂດຍໄລ່ແຕ່ວັນທີ 1 ຕຸລາໜ້ານີ້ເປັນຕົ້ນໄປ ແລະ ທີ່ລະດັບ 2 ລ້ານບາເຣນ ພາຍໃນ 12 ເດືອນ ນັບແຕ່ວັນທີ 1 ມັງກອນປີໜ້າເປັນຕົ້ນໄປ ນອກຈາກນັ້ນແລ້ວ ລະດັບສົ່ງອອກນ້ຳມັນດິບເຂົ້າໄປໃນ ສປປ ເກົາຫຼີ ກໍຖືກກຳນົດໄວ້ທີ່ລະດັບໃນປັດຈຸບັນ ຄືທີ່ 2 ລ້ານບາເຣນຕໍ່ 1 ປີ.
ເມື່ອທຽບໃສ່ສະບັບຮ່າງແລ້ວ ມະຕິໃໝ່ທີ່ໄດ້ຮັບການຮັບຮອງນັ້ນ ໄດ້ຍົກເວັ້ນການສະເໜີໃຫ້ຢຸດຕິຢ່າງສິ້ນເຊີງຕໍ່ການຊຳລະໃຫ້ແກ່ແຮງງານ ສປປ ເກົາຫຼີ ທີ່ພວມເຮັດວຽກຢູ່ຕ່າງປະເທດ ມະຕິໃໝ່ໄດ້ສະເໜີໄປຍັງບັນດາປະເທດທີ່ຮັບເອົາແຮງງານຈາກ ສປປ ເກົາຫຼີ ຕ້ອງໄດ້ລາຍງານໃຫ້ອົງການສະຫະປະຊາຊາດ (ສປຊ) ກ່ຽວກັບຈຳນວນຄົນຂອງ ສປປ ເກົາຫຼີ ຊຶ່ງເຂົາເຈົ້າຮັບສະໝັກ ລວມເຖິງເວລາສິ້ນສຸດສັນຍາ ມະຕິໃໝ່ຍັງໄດ້ຍົກເລີກການປິດລ້ອມຊັບສິນ ຫ້າມເດີນທາງໄປມາໃນທົ່ວໂລກ ສຳລັບທ່ານ ກິມ ເຈິງອູນ ຜູ້ນຳ ສປປ ເກົາຫຼີ.
ທີ່ໜ້າໃສ່ໃຈກໍແມ່ນມະຕິໃໝ່ ໄດ້ຮຽກຮ້ອງການຜັນຂະຫຍາຍມາດຕະການດ້ານການທູດ ໃນນັ້ນມີການຮື້ຟື້ນການເຈລະຈາ 6 ຝ່າຍ.
ຂໍ້ມູນຈາກ: vientianemai
