ສ ເກົາຫຼີ ສຳເລັດການຜັນຂະຫຍາຍ THAAD
ກະຊວງປ້ອງກັນປະເທດ ສ ເກົາຫຼີ ແຈ້ງໃຫ້ຮູ້ວ່າ ການຜັນຂະຫຍາຍ “ຕາມແຜນການ” ສຳລັບລະບົບປ້ອງກັນລູກສອນໄຟຕຳແໜ່ງສູງໄລຍະສຸດທ້າຍ (THAAD) ໄດ້ສຳເລັດລົງແລ້ວ ໂດຍເອີ້ນວ່າ ນີ້ເປັນມາດຕະການສຸກເສີນເພື່ອຮັບມືກັບໄພຄຸກຄາມຈາກຝ່າຍ ສປປ ເກົາຫຼີ.
ແຈ້ງການດັ່ງກ່າວຖືກນຳອອກມາທັນທີ ຫຼັງຈາກທີ່ກອງກຳລັງຂອງ ສ ອາເມຣິກາຢູ່ໃນ ສ ເກົາຫຼີ ເຄື່ອນຍ້າຍຖານຍິງລູກສອນໄຟສະກັດຕື່ມອີກ 4 ຖານ ເຂົ້າໄປໃນຖານທັບໃໝ່ຂອງເຂົາເຈົ້າ ຢູ່ໃນເມືອງເຊອອງຈູ ຫ່າງຈາກນະຄອນຫຼວງເຊອູນ ປະມານ 300 ກມ ໄປທາງທິດໃຕ້.
ກ່ອນໜ້ານັ້ນ ລົດຮັບໃຊ້ການທະຫານຂອງ ສ ອາເມຣິກາ ປະມານ 10 ຄັນ ໄດ້ນຳເອົາພາຫະນະອຸປະກອນ THAAD ທີ່ໄດ້ຮັບການຢັ້ງຢືນວ່າ ອອກໄປຈາກຖານທັບອາກາດໂອຊານ ຫ່າງຈາກນະຄອນຫຼວງເຊອູນ ປະມານ 70 ກມ ໄປທາງທິດໃຕ້ ມຸ່ງໜ້າໄປຍັງຖານທັບໃນເມືອງເຊອອງຈູ.