ເຫດກໍ່ການຮ້າຍລອນດອນມີ 7 ຄົນເສຍຊີວິດໃນເຫດ ແລະ ຜູ້ຕ້ອງຫາ 3 ຄົນຖືກຍິງຕາຍ
ວັນທີ 5 ມິຖຸນານີ້, ຕາມຂ່າວແຈ້ງວ່າ ເຫດການໂຈມຕີແບບກໍ່ການຮ້າຍສອງເທື່ອທີ່ເກີດຂຶ້ນຢູ່ນະຄອນຫຼວງລອນດອນຂອງອັງກິດໃນຕອນຄໍ່າວັນທີ 3 ມິຖຸນານີ້ ໄດ້ເຮັດໃຫ້ 7 ຄົນເສຍຊີວິດ, ຕຳຫຼວດໄດ້ຍິງຜູ້ຕ້ອງຫາ 3 ຄົນຕາຍ.
ຕຳຫຼວດອັງກິດອອກຖະແຫຼງການວ່າ: ມີຕຳຫຼວດຜູ້ໜຶ່ງໄດ້ຮັບບາດເຈັບໜັກໃນເວລາແກ້ໄຂເຫດການ. ນອກນີ້,ຂ່າວແຈ້ງອີກວ່າ ໄດ້ສົ່ງຜູ້ໄດ້ຮັບບາດເຈັບ 40 ກວ່າຄົນໄປປິ່ນປົວຢູ່ໂຮງໝໍ.
ຕອນຄໍ່າວັນທີ 3 ມິຖຸນານີ້,ຢູ່ຂົວລອນດອນ, ຕະຫຼາດແຫ່ງໜຶ່ງທີ່ຢູ່ໃກ້ຂົວລອນດອນແລະວອັກສ໌ຮໍທີ່ຢູ່ພາກຕາເວັນຕົກສຽງໃຕ້ຂອງລອນດອນໄດ້ເກີດເຫດການທຳລາຍຄວາມສະຫງົບ 3 ເທື່ອ, ໃນນັ້ນ,ລວມທັງເຫດການທີ່ລົດຂົນສົ່ງສິນຄ້າຄັນໜຶ່ງຕຳຄົນກຳລັງຍ່າງຢູ່ເທິງຂົວລອນດອນ. ປະຈຸບັນ, ຕຳຫຼວດອັງກິດໄດ້ກຳນົດເຫດການສອງເທື່ອທີ່ເກີດຂຶ້ນກ່ອນເປັນການໂຈມຕີແບບກໍ່ການຮ້າຍ, ເຫດການທີ່ເກີດຂຶ້ນຢູ່ວອັກສ໌ຮໍເປັນເຫດການທີ່ທຳຮ້າຍຜູ້ອື່ນດ້ວຍມີດ,ບໍ່ມີສ່ວນກ່ຽວພັນເຖິງເຫດການອີກສອງລາຍ.
ອັງກິດຈະຈັດການເລືອກຕັ້ງໃນວັນທີ 8 ມິຖຸນານີ້. ທ່ານນາງເທີເຣຊາ ມາຣີ ເມ ນາຍົກລັດຖະມົນຕີອັງກິດທີ່ກຳລັງແຂ່ງຂັນຮັບການເລືອກຕັ້ງຢູ່ຕ່າງແຂວງໄດ້ກັບຄືນສູ່ສຳນັກງານນາຍົກລັດຖະມົນຕີທີ່ລອນດອນໂດຍດ່ວນໃນຕອນຄໍ່າວັນທີ 3 ມິຖຸນານີ້. ນາງໄດ້ໃຊ້ຄຳສັບ"terrible"ມາບັນລະຍາຍເຫດການທີ່ເກີດຂຶ້ນໃນຕອນຄໍ່າມື້ດຽວກັນ,ແລະຈະຮັບມືໂດຍຖືເຫດການແບບນີ້ເປັນ"ການກໍ່ການຮ້າຍທີ່ບົ່ມຊ້ອນ".
ປະຈຸບັນ, ສະຖານທູດຈີນປະຈຳອັງກິດກຳລັງຕິດຕາມສະພາບການຂອງເຫດການດັ່ງກ່າວຢ່າງໃກ້ຊິດ,ຍັງບໍ່ມີການລາຍງານວ່າມີຄົນຈີນເສຍຊີວິດຫຼືໄດ້ຮັບບາດເຈັບໃນເຫດການດັ່ງກ່າວ.
