ຍີ່ປຸ່ນ ສົ່ງເສີມການສຶກສາລາວ
ພິທີເຊັນເອກະສານແລກປ່ຽນການຊ່ວຍເຫຼືອລ້າ ໂຄງການອອກແບບເພື່ອປັບປຸງສະພາບແວດລ້ອມ ຂອງໂຮງຮຽນມັດທະຍົມຕອນຕົ້ນຢູ່ພາກກາງ ແລະ ພາກໃຕ້ ມູນຄ່າ 46 ລ້ານເຢັນ ປະມານ 414.676 ໂດລາສະຫະລັດ ໂດຍການຊ່ວຍເຫຼືອລ້າຈາກລັດຖະບານຍີ່ປຸ່ນ ເພື່ອຈັດຕັ້ງປະຕິບັດໂຄງການດັ່ງກ່າວ ເປັນຕົ້ນ ການສ້າງອາຄານຮຽນໃໝ່ ຫໍພັກນັກຮຽນ ແລະ ຫ້ອງນ້ຳ.
ພິທີຈັດຂຶ້ນວັນທີ 26 ພຶດສະພາ 2017 ທີ່ກະຊວງການຕ່າງປະເທດ ຮ່ວມລົງນາມໂດຍທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ ແລະ ຕາງໜ້າລັດຖະບານຍີ່ປຸ່ນແມ່ນທ່ານ ທາເກຊິ ຮິຄິຮາຣະ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ໂດຍຊ້ອງໜ້າພະນັກງານທີ່ກ່ຽວຂ້ອງທັງສອງຝ່າຍເປັນພິຍານ.
ໃນແຜນພັດທະນາເສດຖະກິດ-ສັງຄົມແຫ່ງຊາດ ລັດຖະບານລາວ ໄດ້ວາງເອົາການສຶກສາເປັນໜຶ່ງໃນຂະແໜງການທີ່ສຳຄັນທີ່ສຸດ ເພາະວ່າການເປີດກວ້າງ ແລະ ການພັດທະນາການສຶກສາຂັ້ນພື້ນຖານ ໃນການພັດທະນາຊັບພະຍາກອນມະນຸດ ແນໃສ່ການຂະຫຍາຍເສດຖະກິດຢ່າງຕໍ່ເນື່ອງ ແລະ ການລຶບລ້າງຄວາມທຸກຍາກ ເປັນຂະແໜງບຸລິມະສິດຂອງນະໂຍບາຍແຫ່ງຊາດ ສປປ ລາວ ໄດ້ກຳນົດໃຫ້ການສຶກສາຂັ້ນມັດທະຍົມຕອນຕົ້ນ ເປັນການສຶກສາພາກບັງຄັບ ໃນເດືອນກໍລະກົດ 2015 ນອກນັ້ນ ແຜນພັດທະນາຂະແໜງການສຶກສາ ຄັ້ງທີ 8 (ESDP 2016-2020) ມີເປົ້າໝາຍທີ່ຈະເພີ່ມຈຳນວນອັດຕາການລົງທະບຽນຂອງການສຶກສາຂັ້ນມັດທະຍົມຕົ້ນ ໃຫ້ໄດ້ 85% ພາຍໃນປີ 2020 ເພື່ອຈະສ້າງວິໄສທັດແຫ່ງຊາດ ໃນການຫຼຸດພົ້ນອອກຈາກສະຖານະປະເທດດ້ອຍພັດທະນາ ໃຫ້ປາກົດຜົນເປັນຈິງ ໃນປີ 2020 ໃນໂອກາດດັ່ງກ່າວທ່ານ ແສງເພັດ ຮຸ່ງບຸນຍວງ ໄດ້ສະແດງຄວາມຂອບໃຈຢ່າງເລິກເຊິ່ງຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫຼືອ ສປປ ລາວ ມາຕະຫຼອດ ຊຶ່ງເປັນການປະກອບສ່ວນອັນສຳຄັນ ເຂົ້າໃນການພັດທະນາພື້ນຖານໂຄງລ່າງຂອງ ສປປ ລາວ ໂດຍສະເພາະການສົ່ງເສີມວຽກງານດ້ານການສຶກສາ ກໍ່ຄືການພັດທະນາຊັບພະຍາກອນມະນຸດຢູ່ຊົນນະບົດໃຫ້ດີຂຶ້ນ.