ສ ເກົາຫຼີ ໃຫ້ທຶນຊ່ວຍເຫຼືອຄ່າປິ່ນປົວ ແລະ ທີ່ຢູ່ອາໄສເດັກນ້ອຍ
ມູນນິທິຊາວພຸດ ສ ເກົາຫຼີ ເພື່ອຊ່ວຍເຫຼືອສະຫວັດດີການ-ສັງຄົມ (KBF) ໄດ້ໃຫ້ການຊ່ວຍເຫຼືອການຈັດຕັ້ງປະຕິບັດໂຄງການສະໜັບສະໜູນທີ່ຢູ່ອາໄສຊົ່ວຄາວ ແລະ ຄ່າປິ່ນປົວໃຫ້ແກ່ເດັກນ້ອຍທີ່ເປັນພາຍາດມະເຮັງຢູ່ໂຮງໝໍເດັກ ໄລຍະ 2 ລວມມູມຄ່າ 268.560 ໂດລາສະຫະລັດ ຫຼື ປະມານ 1,6 ຕື້ກີບໃນໄລຍະ 3 ປີ ໃນນັ້ນປະກອບມີໃຫ້ການຊ່ວຍເຫຼືອດ້ານການຜ່າຕັດ ການປິ່ນປົວທາງດ້ານຈິດໃຈ ໃຫ້ການສຸຂະສຶກສາແກ່ເດັກນ້ອຍ ແລະ ຄອບຄົວທີ່ມາປິ່ນປົວຢູ່ໂຮງໝໍ ລວມທັງຄ່າໃຊ້ຈ່າຍໃຫ້ແກ່ຄະນະແພດ ທີ່ເຂົ້າຮ່ວມການເຝີກອົບຮົມ.
ພິທີເຊັນບົດບັນທຶກຄວາມເຂົ້າໃຈລະຫວ່າງໂຮງໝໍເດັກ ແລະ ມູນນິທິຊາວພຸດ ສ ເກົາຫຼີ ເພື່ອຊ່ວຍເຫຼືອສະຫວັດດີການ-ສັງຄົມ (KBF) ກ່ຽວກັບການສະໜັບສະໜູນໂຄງການໄລຍະ 2 ປະຈຳ ປີ 2017 ຈັດຂຶ້ນວັນທີ 30 ພຶດສະພາ 2017 ທີ່ໂຮງໝໍເດັກ ນະຄອນຫຼວງວຽງຈັນ ຮ່ວມລົງນາມຂອງທ່ານນາງ ສົມມະນີຄອນ ຜາງມະນີໄຊ ຜູ້ອຳນວຍການໂຮງໝໍເດັກ ແລະ ທ່ານ ຄິມຈີຊູ ຜູ້ອຳນວຍການມູນນິທິຊາວພຸດ ສ ເກົາຫຼີ ເພື່ອຊ່ວຍເຫຼືອສະຫວັດດີການ-ສັງຄົມ ເຊິ່ງມີພະນັກງານວິຊາການສອງຝ່າຍເຂົ້າຮ່ວມ.
