ສະຫະພາບເອີຣົບ ສືບຕໍ່ຊວ່ຍເຫລືອ ສປປ ລາວ 500 ລ້ານເອີໂຣ
ສະຫະພາບເອີຣົບ (EU) ມີແຜນສືບຕໍ່ຊວ່ຍເຫລືອ ສປປ ລາວ ໃນຫລາຍຂະແໜງການ ດ້ວຍການອະນຸມັດ ງົບປະມານ 500 ລ້ານເອີໂຣ ໄລຍະເວລາ 5 ປີ ແຕ່ປີ 2016 ຫາ 2020. ການຊວ່ຍເຫລືອດັ່ງກ່າວ, ແມ່ນສຸມໃສ່ 6 ຂະແໜງການ ມີ ຂະແໜງກະສິກໍາ, ການພັດທະນາ ຊົນນະບົດ, ໂພຊະນາການ, ການບໍລິຫານການຄຸ້ມຄອງ, ສຸຂະພາບ ແລະ ການສືກສາ.
ທ່ານ ເລໂອ ຝາແບກ Leo Faber ເອກອັກຄະລັດຖະທູດ ຄະນະຜູ້ແທນ ສະຫະພາບເອີຣົບ ປະຈໍາ ສປປ ລາວ ໃດ້ໃຫ້ສໍາພາດຕໍ່ນັກຂ່າວ ສໍານັກຂ່າວສານປະເທດລາວ ກ່ຽວກັບແຜນການ ຊວ່ຍເຫລືອ ສປປ ລາວ ຂອງສະຫະພາບເອີຣົບ ໃນໂອກາດງານລ້ຽງ ຕ້ອນຮັບສະມາຊິກ ລັດຖະສະພາເອີຣົບ ວັນທີ 01 ພະຈິກ 2017 ທີ່ສະຖານທູດຝຣັ່ງ ປະຈໍາ ສປປ ລາວ.
ທ່ານ ນາງ ໂກຣດີນ ເລີດູ ເອກອັກຄະລັດຖະທູດ ສາທາລະນະລັດຝຣັ່ງ ປະຈໍາ ສປປ ລາວ ກ່າວໃນໂອກາດ ງານລ້ຽງຕ້ອນຮັບວ່າ: ພວກເຮົາຕ້ອງສູ້ຊົນ ໃນວຽກງານການພົວພັນ ຮ່ວມມືກັບພາຍນອກ, ສະຫະພາບເອີຣົບ ໄດ້ປະກອບສ່ວນ ດ້ານທືນຮອນພາຍໃຕ້ ແຜນງານກອງທືນເອີຣົບ ເພື່ອການພັດທະນາ ຄັ້ງທີ 11 ມີມູນຄ່າເຖິງ 29 ຕື້ເອີໂຣ. ການປະກອບສວ່ນ ຂອງສະຫະພາບເອີຣົບ ເປັນການສະແດງ ເຖິງຄວາມສາມັກຄີ ແລະ ເຮັດໃຫ້ EU ກາຍເປັນໜຶ່ງໃນບັນດາ ຜູ້ໃຫ້ທືນຫລັກ.
ມາເຖິງປັດຈຸບັນ ສະຫະພາບເອີຣົບ ໄດ້ໃຫ້ການຊ່ວຍເຫລືອ ສປປ ລາວ ໃນຮູບການທືນຊວ່ຍເຫລືອລ້າ ມີມູນຄ່າປະມານ 207 ລ້ານເອີໂຣ ແລະ ຈະສືບຕໍ່ໃຫ້ການຊ່ວນເຫລືອ ອີກຕໍ່ໄປຈົນເຖິງ ປີ 2020.
ພາບ-ຂ່າວ: ພູລາວັນ | ຂປລ